27 июля 2025 г.
Республикӑри сывлӑх енчен хавшак ачасемпе ҫамрӑксен реабилитаци центрӗнче сусӑрсене пулӑшмалли ҫӗнӗ проект пурнӑҫланать. Ӑна 2021-мӗш ҫулта кунта уҫӑлнӑ аутизмпа аптӑракан ачасен ресурс центрӗнче йӗркелеҫҫӗ.
"РАСтем вместе" проекта "Чӑваш Ен" фонд пулӑшнипе йӗркелеҫҫӗ. Кӑҫал пуҫланӑ ӗҫ-пуҫ ҫитес ҫулччен тӑсӑлӗ. Проектпа килӗшӳллӗн регионти ресурс центрӗ валли тӗрлӗ хатӗр туяннӑ, кунти специалистсем ятарлӑ вӗренӳ витӗр тухнӑ. Халӗ центрта аутизм чирӗпе аптӑракан ачасене пурнӑҫа хӑнӑхма, ыттисемпе хутшӑнма, калаҫма вӗренме пӗтӗм май пур. Шел пулин те, ҫак амак ҫулсерен сарӑлсах пырать. Ҫавна май чирлӗ ачасене тата вӗсен ашшӗ-амӑшне пулӑшу кирлех. 6 ҫулти Никита центра хаваспах ҫӳрет. "Аталану енӗпе те ачан ӳсӗмсем самаях пур", - тет арҫын ачан амӑшӗ.
Ресурс центрӗ аутизмпа аптӑракан 3 ҫултан пуҫласа 17 ҫулчченхи ачасемпе ҫамрӑксене йышӑнать. Ҫулталӑкне вӗсем 3 хут реабилитаци тухаҫҫӗ. Ачасемпе кунта дефектолог, логопед, психолог, социаллӑ педагог тата методист ӗҫлет. Специалистсем ашшӗ-амӑшне те тимлӗх уйӑрма манмаҫҫӗ.
Тухтӑрсем кунта кашни ачапа уйрӑммӑн ӗҫлеҫҫӗ. Кунне сехет ҫурӑ вӑхӑт уйӑраҫҫӗ. Проектпа килӗшӳллӗн туяннӑ хатӗрсем вара ӗҫсене тата пахалӑхлӑрах пурнӑҫлама, вӗренӗве кӑткӑсрах ирттерме пулӑшаҫҫӗ. Сӑмахран, чӑн-чӑн хваттер евӗр йӗркеленӗ пӳлӗмре ачасем кулленхи пурнӑҫра хӑйсене хӑйсем пӑхма хӑнӑхаҫҫӗ. Интерактивлӑ панельсем те вӗсене илӗртеҫҫӗ.
Тӑм мастерскойӗ те пур кунта. Ачасем ҫемҫе материалпа аллисене лайӑхрах ӗҫлеттереҫҫӗ, илеме курма тата мӗн те пулин ӑсталама вӗренеҫҫӗ. Хальхи технологи хатӗрӗсемпе тивӗҫтернӗ пӳлӗмсем пур енлӗн аталанма пулӑшаҫҫӗ.
Тухтӑрсен сӑмахӗпе, аутизмран пач хӑтӑлма май ҫук. Ҫапах вӑхӑтра пулӑшу кӳрсен ача хӑй тӗллӗн тӗрлӗ ӗҫе хӑнӑхать, ҫынсемпе хутшӑнма пуҫлать, хӑйне хӑратакан туйӑмсене парӑнтарать. Ҫапла майпа вӑл ыттисенчен нимпе те уйрӑлса тӑман ҫын пулма пултарать.
Оксана Верликова, Святослав Петров.
© «Государственный Интернет-Канал «Россия» 2001 - 2018. Свидетельство о регистрации СМИ Эл № ФС 77-59166 от 22 августа 2014 года. Учредитель - федеральное государственное унитарное предприятие «Всероссийская государственная телевизионная и радиовещательная компания». Главный редактор – Панина Елена Валерьевна. Все права на любые материалы, опубликованные на сайте, защищены в соответствии с российским и международным законодательством об интеллектуальной собственности. Любое использование текстовых, фото-, аудио- и видеоматериалов возможно только с согласия правообладателя (ВГТРК, в лице филиала ГТРК «Чувашия»). Для детей старше 16 лет.
Адрес электронной почты редакции: chebtv@tvr.chtts.ru, rusnewstv@tvr.chtts.ru
Реклама на сайте: тел. +7 (8352) 57-01-01, е-mail: ric1@tvr.chtts.ru
Подробнее...
8741109893739